Тэрбиш 
Барилгын салбарын хөгжилд шинэ технологи, үйлдвэрлэлийн стандартыг нэвтрүүлэгч байгууллагуудын нэг болох Эн Си Ди Прекон ХХК энэ удаагийн “Барилга Экспо” үзэсгэлэн яармагт амжилттай оролцож, “Шилдэг үйлдвэрлэгч” шагналын эзнээр тодорлоо.
Энэ удаагийн "BARILGA EXPO" олон улсын барилгын үзэсгэлэн яармагт барилгын салбарт үйл ажиллагаа явуулж буй үндэсний болон гадаадын 400 орчим аж ахуй нэгжүүд оролцсоноос 7 аж ахуй нэгж шилдгээр шалгарчээ.
Жил бүр уламжлал болгон зохион байгуулагддаг тус арга хэмжээ нь барилгын салбарын шилдэг компаниуд, дэвшилтэт шийдэл, инновацийг нэг дор цуглуулдаг онцлогтой. Энэ жилийн хувьд угсармал барилгын технологи, үйлдвэрлэлийн үр ашиг, тогтвортой хөгжлийн шийдлүүд онцгой анхаарал татсан бөгөөд Эн Си Ди Прекон ХХК эдгээр чиглэлд манлайлан оролцсон нь ийнхүү үнэлэгдэв.
Тус компани нь үйлдвэрийн орчинд өндөр нарийвчлалтайгаар бэлтгэсэн угсармал хийц, каркас бүтээц, барилгын элементүүдийг зах зээлд нийлүүлдэг бөгөөд талбай дээрх ажлын хугацааг богиносгох, хүний нөөцийн хамаарлыг бууруулах, чанарын тогтвортой байдлыг хангах зэрэг олон давуу талыг бий болгож байна.
Сүүлийн жилүүдэд барилгын салбар улам бүр үйлдвэрлэлжих хандлагатай болж буй энэ үед Эн Си Ди Прекон ХХК-ийн нэвтрүүлж буй шийдлүүд нь зөвхөн хугацаа, зардлыг хэмнэхээс гадна илүү ухаалаг, тогтвортой барилгын хөгжлийг дэмжиж байгаагаараа онцлог юм.
“Шилдэг үйлдвэрлэгч” шагнал нь тус компанийн технологийн шийдэл, үйлдвэрлэлийн чадавх, чанарын удирдлагын тогтолцоог салбарын хэмжээнд өндрөөр үнэлснийг илэрхийлж байна.
Цаашид Эн Си Ди Прекон ХХК нь Монгол Улсад угсармал барилгын үйлдвэрлэлийг шинэ түвшинд хүргэх, олон улсын жишигт нийцсэн бүтээгдэхүүн, шийдлийг нутагшуулах зорилгоор үйл ажиллагаагаа өргөжүүлсээр байх болно.
Эх сурвалж: https://www.barilga.mn/n/35201/